Ўзбекистон “Адолат” социал-демократик партияси Жиззах вилоят кенгашининг навбатдаги Пленумида 2015 йилда эришилган ютуқлар баробарида йўл қўйилган хато ва камчиликлар атрофлича таҳлил этилди.

Таъкидланганидек, ўтган давр мобайнида вилоят партия ташкилоти фаолиятида муайян ютуқларга эришилди. Бу асосан ташкилий-партиявий ишларда, тарғибот-ташвиқот тадбирлари кенг қамров касб этаётгани ва ижтимоий ҳамкорлик асосида қилинаётган ишларда ўз аксини топди.

Мафкуравий йўналишда ўтказилган тадбирлар мониторинги юритилиб, улар асосида маҳаллий ташкилотларнинг фаолияти мувофиқлаштирилиб борилди. Ўтган йилда партия томонидан турли йўналишларда 350 дан ортиқ тадбирлар ўтказилиб, уларда ўн бир минг нафардан зиёд фуқаролар қатнашди.

Партия Сайловолди дастури ижросини таъминлаш, электорат манфаатларини самарали ҳимоя қилишда бошланғич партия ташкилотларининг фаоллиги муҳим аҳамиятга эга. БПТлар фаолиятини янгича ёндашувлар асосида ўзгартириш борасида қилинадиган ишлар кўп. Бу борада БПТлар учун партиявий-сиёсий ўқувларнинг самарасини ошириш, зарур тарғибот-ташвиқот материаллари билан доимий таъминлаш орқали фуқароларнинг партия ғояларига қизиқиши ортишига эришиш мумкин. Пленумда маҳаллий вакиллик органларидаги партия депутатлик гуруҳлари билан қуйи ташкилотларнинг алоқаларини кучайтириш, ягона сиёсий платформада туриб, электорат манфаатларини ҳимоя қилиш имкониятларини кенгайтириш масалаларига алоҳида эътибор қаратилди. “Аёллар қаноти”, “Ёш адолатчилар” қаноти фаоллари хотин-қизлар ва ёшлар манфаатларини ифодалаган амалий ишлари, изланувчанлиги, интеллектуал салоҳиятини намоён этиш орқали аҳоли ўртасида партия ғояларининг халқчил моҳиятини кенг тушунтиришлари лозимлиги таъкидланди.

Иштирокчилар эришилган ютуқлар билан бирга фаолиятда йўл қўйилган камчиликлар хусусида атрофлича фикр юритдилар.

— Айрим ҳудудларда аҳоли қатламлари билан олиб борилган тадбирлар сони ва сифатини ҳали ҳам талаб даражасида деб бўлмайди, — деди вилоят партия кенгаши раиси Рустам Тўйчиев. — Арнасой, Дўстлик, Зарбдор, Зомин ва Пахтакор туманлари кенгашларининг фаолиятини талаб даражасига кўтариш зарур.

Пленумда туман ва шаҳар партия кенгашлари иш услуби, шакл ва формаларини янгилаш, партия аъзолари, бошланғич партия ташкилотлари фаоллигини кучайтиришга доир таклифлар ўртага ташланиб, фикр-мулоҳазалар билдирилди. Қайд этилганидек, бу борада иш режаларини қайта кўриб чиқиш, тарғибот-ташвиқот фаолиятини аниқ манзилли режалар билан бойитиш, ижро интизомини мустаҳкамлаш ва кадрлар масъулиятини ошириш зарур.

Мажлисда маҳаллий вакиллик органларидаги партия депутатлик гуруҳларининг фаолияти танқидий нуқтаи назардан муҳокама этилиб, депутатлар ўз ваколатларидан унумли фойдаланмаётгани, ҳисобот даврида етарли даражада ташаббус кўрсатмаганлиги жиддий танқид қилинди. Улар сайловчилар билан ишлаш тажрибаларини ошириши, долзарб масалаларни ҳал этишда ташаббускор бўлишлари лозимлиги алоҳида таъкидлаб ўтилди.

Пленумда кўрилган масалалар юзасидан тегишли қарорлар қабул қилинди.

Пленум ишида Ўзбекистон “Адолат” СДП Сиёсий Кенгаши раиси ўринбосари Абдукамол Раҳмонов иштирок этди.

Муқимбой ИСМОИЛОВ,

“Adolat” мухбири

Мустақиллигимизнинг 25 йиллиги арафасида Ватанимизнинг барча шаҳар ва туманларида Ўзбекистон Республикаси Вазирлар Маҳкамасининг 2016 йил 29 февралдаги Ўзбекистон Республикаси давлат мустақиллигининг 25 йиллиги муносабати билан “Ким эдигу ким бўлдик, эртага қандай юксак марраларни эгаллашимиз керак?” мазмунидаги тарғибот тадбирлари бўлиб ўтмоқда. Масалан, Янгиобод туманидаги тадбирда Жиззах вилоят ҳокимлиги, Олий ва ўрта махсус таълим вазирлиги, Халқ таълими вазирлиги, Ўзбекистон Ёзувчилар уюшмаси, Республика маънавият тарғибот маркази, “Ўзбеккино” миллий агентлиги, “Ўзбекнаво” эстрада бирлашмаси,  “Ўзбектеатр” ижодий ишлаб чиқариш бирлашмаси, Ёшлар маданият ва санъат маркази, Ўзбекистон “Адолат” СДП Жиззах вилоят Кенгаши  масъул вакиллари иштирок этдилар.

Тадбирда иштирокчилар ўқувчи-ёшларни умуминсоний ва миллий қадриятлар, юксак инсоний фазилатлар руҳида тарбиялаш, уларнинг онги ва қалбини мафкуравий, маънавий ва ахборот таҳдидларидан ишончли ҳимоя қилиш, уларда ғоявий иммунитет ва фаол фуқаролик позициясини шакллантириш борасида қатор салмоқли ишлар амалга оширилаётганини таъкидладилар.

Шунингдек, тадбирда тарғибот гуруҳига ҳамроҳлик қилган партиянинг вилоят Кенгаши раиси Янгиобод тумани 49-Баландчақир сайлов округидан вилоят Кенгаши депутати, депутатлик гуруҳи раҳбари Рустам Тўйчиев иштирок этиб, юртимизда мустақилликдан олдин бўлган давр ҳамда мустақиллик йилларида турли соҳаларда, жумладан таълим соҳасида эришилган ютуқлар, бунёдкорлик ишлари, тинчлик ва барқарорликни сақлаш борасида олиб борилаётган ишлар, Қуролли Кучлар тизимидаги ислоҳотлар, миллий армиямизнинг қудрати ва салоҳияти, бугунги кун ёшлари учун яратилаётган имкониятлар ва уларнинг самараси тўғрисида сўз юритди.

Бугунги кунда дунёнинг турли давлатларида юз бераётган нотинчликлар, диний экстремистик оқимлар ва улар томонидан амалга оширилаётган хунрезликларнинг ортида турган кучлар ҳамда уларнинг ғаразли мақсадларини ёшларга очиб бериш, уларнинг мафкуравий иммунитетини янада мустаҳкамлашга қаратилган чораларни изчил давом эттириш зарур. Жойларда бу каби тадбирларнинг ўтказилиши ўсиб келаётган ёш авлод вакиллари учун тинчлик олий неъмат эканлиги, ёшларимизнинг яратилаётган ҳар бир имкониятдан унумли фойдаланишлари  лозимлиги тушунтирилди.

Тадбир иштирокчиларидан бири жойларда бу каби тадбирларнинг ташкил этилиши, мактаб ва ўрта махсус таълим муассасалари ўқувчи ёшларининг ўзига хос қизиқишини кўриб ажабландим, – дейди Ўзбек давлат  драма театри актрисаси Гавҳар Ҳакимова. – Мени ҳайратда қолдирган нарса шу бўлдики, ёшларнинг билимга чанқоқ, ҳеч бир нарса уларнинг диққат-эътиборидан четда қолиб кетмаяпти. Баъзи ўқувчи ёшларимизнинг инглиз ва рус тилларда  эркин гаплаша олиши, хорижий тилларда шеърлар айтиб бериши мени ҳайратда қолдирди. Юртимизда ёшларимизнинг билим олишлари учун яратилаётган имкониятлар самарасига бугун яна бир карра гувоҳ бўлдик.

Маърифат МАВЛОНОВА,

Ўзбекистон “Адолат” СДП

Жиззах вилоят Кенгаши

Матбуот котиби.

Буюк Соҳибқирон Амир Темурнинг “Куч адолатдадир” деган ҳикмати неча асрлар давомида халқимиз ҳаётидан кенг ўрин эгаллаб келмоқда. Соҳибқирон бобомиз ниҳоятда адолатли, шу билан бирга жисмонан бақувват, кучли ирода соҳиби бўлган. Ана шундай буюк аждодимизни ёд этган ҳолда Ўзбекистон “Адолат” СДП Жиззах вилоят Кенгаши ва шаҳар Кенгашлари ташаббуси билан Жиззах давлат Политехника институти қошидаги академик лицейда Амир Темур таваллудининг 680 йиллиги муносабати билан “Куч – адолатда” мавзусида тадбир ўтказилди. Тадбирда партиянинг вилоят Кенгаши раис ўринбосари Н.Жўраева, партиянинг шаҳар Кенгаши раиси Р.Набиев ҳамда лицейнинг ўқитувчи ва ўқувчилари иштирок этдилар.

Тадбирни партиянинг вилоят Кенгаши раис ўринбосари Нигора Жўраева очиб бериб,  соҳибқироннинг ҳаёти ва амалга оширган ишлари, тарихда тутган ўрни тўғрисида тўхталиб ўтди.

Амир Темур давлатни бошқаришга катта эътибор бериб, ҳар бир вилоятда Девон деб аталувчи бошқарма тузган. Бу бошқармалар солиқ йиғиш, тартиб сақлаш, ижтимоий бинолар — бозорлар, ҳаммомлар, йўллар, суғориш тармоқларига қараб туриш ва аҳолининг хулқий-ахлоқий ҳаракатларини назорат остига олиш каби ишлар билан шуғулланган.

Амир Темур тарихчилар тасвирича, Ўрта асрнинг атоқли давлат ва ҳарбий арбобларидан бўлиб, Оврўпо олимлари ўз асарларида унинг салбий томонлари билан бирга муҳим фазилатларини ҳам таъкидлаб ўтганлар. Немис олими Ф. Шлоссер ўзининг «Жаҳон тарихи» (III-том) асарида: «Бахтиёр жангчи, жаҳонгир, узоқ Шарқда қонуншунос бўлиш билан бирга ўзида, Осиёда кам учрайдиган тактик ва стратегик билимларни ифодалади», деб ёзса, атоқли немис олими ва тарихшуноси М. Вебер: «Темур ўз душманларига нисбатан жуда бераҳм эди, лекин саркардалик, давлатни бошқариш ва қонунчилик соҳасида буюк талантга эга эди», деб таърифлайди.

Шунингдек тадбир давомида сўз олган партиянинг шаҳар Кенгаши раиси Ражаббой Набиев Амир Темур ҳаёти давомида мағлубиятга юз тутмаганлиги, ҳаётида энг кўп қўллаган шиорларидан бири “Куч – адолатдадир” деган ҳикмати эканлиги ва бунга Соҳибқирон Амир Темурнинг қанчалик амал қилганлиги ҳамда бобомизнинг бу шиори бизнинг партиямиз фаолияти билан ҳамоҳанг эканлигини таъкидлади.

Амир Темур ҳаётининг мазмунини адолат билан бирга, инсоф-иймон туйғуси, диёнат мезони ташкил этган. У киши бунёд эттирган мўъжизавор бунёдкорлик ишлари халқимизнинг бебаҳо дурдоналаридан биридир. Амир Темур халқимизнинг фахр-ифтихори сифатида авлодлар қалбида абадий яшайверади.

Тадбир давомида ўқувчилар ўзларини қизиқтирган барча саволларга жавоб олдилар. Давра сухбати сўнгида фаол иштирок этган бир гуруҳ ёшларга партиянинг эсдалик совғалари топширилди.

Маърифат МАВЛОНОВА,

Ўзбекистон “Адолат” СДП

Жиззах вилояти Кенгаши матбуот котиби.

Мамлакатимизда “Кучли давлатдан кучли фуқаролик жамияти сари” тамойили асосида сўнги йилларда миллий қонунчилигимизга киритилган янгиланишларга мувофиқ сиёсий партияларнинг жамиятимиз ижтимоий-сиёсий ҳаётида тутган ўрни ва роли ошиб, ваколатлари янада кенгайди. Айниқса, конституциявий ислоҳотлар асосида маҳаллий вакиллик органларидаги депутатлик гуруҳларининг ваколатлари кенгайтирилгани бевосита жойларда Давлат дастурлари ҳамда вилоятни ижтимоий-иқтисодий ривожлантириш дастурлари ижросига самарали таъсир ўтказиш, бу борада депутатлик назоратини ўрнатишда муҳим ўрин тутмоқда.

Ўзбекистон “Адолат” СДП Жиззах шаҳар  Кенгашининг навбатдаги Пленуми бўлиб ўтди. Пленумда партиянинг шаҳар Кенгашидаги депутатлик гуруҳи аъзолари ва вилоят Кенгаши депутати  Аброр Ҳусниддинов ҳамда партия фаоллари иштирок этдилар. Пленумни кириш сўзи билан партиянинг шаҳар Кенгаши раиси Ражаббой Набиев очиб берди ва кун тартибига  киритилган масалалар билан таништирди.

Шунингдек, Пленумда сўз олган партиянинг депутатлик гуруҳи раҳбари Дилбар Ҳакимова депутатлар томонидан олиб борилаётган амалий ишларнинг ижобий натижаси ва юзага келаётган муаммолар тўғрисида сўз юритди.

Пленумда депутатлар ва депутатлик гуруҳларининг диққат-эътиборидан четда қолаётган ва депутатлик гуруҳи иш режасига киритилиши лозим бўлган масалалар танқид остига олинди.

Шунингдек, тадбирда сўз олган партиянинг Жиззах  вилоят Кенгаши депутати Аброр Ҳусниддинов кун тартибидаги муаммоларнининг келиб чиқиш сабаблари, депутатларнинг бу каби масалаларга эътибор билан қарамаётганлиги ва бунинг салбий оқибатлари тўғрисида ўз фикр-мулоҳазаларини билдирди.

Ўтган чорак давомида ҳар бир депутат учрашувлар ва ОАВдаги чиқишлари орқали фаол иштирок этди, – дейди Жиззах шаҳар Кенгаши депутатлик гуруҳи раҳбари Д.Ҳакимова.  – Улар ўз чиқишлари орқали жойларда олиб бораётган тарғибот-ташвиқот ишлари ва натижалари тўғрисида сўз юритди ҳамда депутатлик гуруҳлари томонидан амалга оширилган ишлар ва улардаги камчиликлар атрофлича муҳокама этилди. Шундан хулоса қилиб, депутатлик гуруҳи аъзолари навбатдаги Пленумда кўтарилган масалалар юзасидан хулоса чиқариб, жорий йилдаги депутатлик гуруҳи аъзолари томонидан  амалга оширилиши лозим бўлган ишлар депутатлик гуруҳининг 2016 йилга мўлжалланган иш режасига киритилди.

Шунингдек, йиғилишда депутатлик гуруҳи аъзолари Ички Ишлар ҳодимлари ҳамда давлат санитария эпидемиология назорат маркази ходимлари билан ҳамкорликда жойлардаги  мактабгача таълим муассасалари, олий ўқув юртлари талабалари ҳамда ўрта махсус касб-ҳунар коллежи ўқувчиларининг кийиниш маданияти ва мактаблардаги ижтимоий тенглик масалалари, тиббий муассасаларининг фуқароларга кўрсатилаётган тиббий хизматларнинг қай даражада эканлиги, тиббий асбоб-анжомларнинг санитария талабларига жавоб бериши каби масалалар бўйича ишлашни ўз олдига мақсад қилиб қўйдилар.

Пелунумда депутатларнинг ўз олдига қўйган мақсад ва вазифалари, депутатлар фаолиятини янада жонлантиришга қаратилган чора-тадбирлар ҳамда кутилаётган натижаларга алоҳида эътибор қаратилди.

Пленум сўнгида депутатлар томонидан амалга оширилган ишлар, партиянинг Жиззах шаҳар Кенгаши ташаббуси билан ўтказилган тадбирлардаги  ютуқ ва камчиликлар таҳлил қилиниб, Жиззах шаҳар Кенгаши тасарруфидаги БПТ аъзолигига 5 нафар аъзолар қабул қилинди ва аъзолик билетлари топширилди.

Маърифат МАВЛОНОВА.

                              Ўзбекистон “Адолат” СДП

Жиззах вилоят  Кенгаши матбуот котиби.

Бугунги кунда диний экстремизм ва терроризм глобал муаммоларидан бири эканлиги ҳеч кимга сир эмас. Шу сабабдан ҳам дунёдаги барча маърифатпарвар кучлар қатори Ўзбекистонда ҳам унга қарши курашиш бўйича кенг миқёсда фаолият олиб борилмоқда.

Бугун диний экстремистик ташкилотларнинг фаолияти янада авж олаётгани, қора байроқ остида жамланган бир гала террорчилар тинч аҳоли турмуш тарзига хавф солаётгани одамни бир қадар ташвишлантиради. Диний оқим ва террористик ташкилотларнинг фитналарида  ўйин иштирокчисига айланиб бораётган юртдошларимизнинг ўз юртига, халқига, ота-онасига ва энг ачинарлиси ўз келажагига нисбатан қилаётган қилмишлари ва хиёнатлари,  жойларда содир этилаётган ўғрилик ва жиноий ишлар одамни ҳайратга солади. Улар ўз юртида тинч аҳоли ҳаётига хавф солиш, мамлакатда миллатлараро низоларни келтириб чиқариш борасида турли иғво ва бўҳтонлар уюштиришдан ҳам тонмайдилар. Бу каби ҳатти-ҳаракатлардан одамларни огоҳ этиш мақсадида “Ўзбекистон” телеканали томонидан тайёрланган “ГТА ёхуд ўйинга айланган ҳаёт” номли хужжатли фильм кенг жамоатчилик эътиборига ҳавола этилмоқда. Мазкур хужжатли фильм “Тошкент”, “Маданият”, “Ёшлар”, “Ўзбекистон” ҳамда “Маҳалла” телеканаллари орқали кенг жамоатчилик эътиборига ҳавола этилди. Ушбу хужжатли фильмда Жиззах вилояти Пахтакор туманида диний экстремистик ҳаракатларни амалга оширишни режалаштирган бир гуруҳ шахсларнинг ноқонуний фаолияти тўғрисида сўз борган.

Огоҳликка даъват этувчи ушбу кўрсатув Ислом дини ниқоби остида ўзининг бир қанча қабих ишларини амалга оширмоқчи бўлган, террористик ташкилотларнинг таъсирига тушган ва ўз юртида ота-онасига қарши қурол кўтаришдан ҳам тонмайдиган ватандошларимиз ҳақида ҳикоя қилмоқда. Барчамизни тобора ҳайратга солаётган нарса шуки, ёвузликка эш пуч ғоялар таъсирида қолганлар орасида дунёнинг жуда кўп давлатлари, хусусан, бизнинг республикамиз “фуқаро”ларининг борлигидир.

Берилган имкониятдан унумли фойдаланмаётган, сувни булғалатиб, одамларнинг юртимиз тўғрисидаги тасаввурларини ўзгартирмоқчи бўлаётганларга, хусусан, хўжасидан суяк олиш инлинжида интернетда турли бўхтонларни тўқиб бичаётганларга, фикримча, умуман эътибор қилмаслик керак. Агар билсалар, уларга ватандан мосуво бўлишнинг ўзи жазо.

Ўзбекистон “Адолат” СДП Жиззах вилоят Кенгаши бу каби ҳолатларнинг олдини олиш ва бу борада аҳоли ўртасида бир қанча тарғибот-ташвиқот ишларини олиб бормоқда. Хусусан партиянинг Жиззах вилоят Кенгаши томонидан ҳафтанинг ҳар душанба куни “Диний экстремизм тинчлик ва маданиятга таҳдид”, “Дунё ҳамжамиятига ошкора таҳдид”, “Миллий ғоя ва маънавият тарғиботи”, “Огоҳ бўлган доғда қолмайди” каби мавзуларда маънавият соати ўтказилиб келинмоқда. Бундан ташқари жойларда “Интернет маданияти ва ахборот хавфсизлиги муҳим вазифамиз”, “Биз вайронкор ғояларга қаршимиз”, “Одам савдоси мудҳиш жиноят” каби мавзуларда тадбирлар ва учрашувлар ўтказилмоқда. Бу каби тадбирларнинг ўтказилиши юртимизда диний экстремизмга қарши кураш борасида олиб борилаётган амалий ишларнинг бир қисмидир.

Хулоса ўрнида шуни айтиш лозимки, ҳар биримиз, айниқса ёшларимиз бу каби иллатларга қарши илм-маърифат, замонавий фан-техника орқали қарши курашишимиз зарур.

                                                   Маърифат МАВЛОНОВА,

                                                   Ўзбекистон “Адолат” СДП Жиззах вилоят Кенгаши матбуот котиби.

Бугунги кунда Ўзбекистон “Адолат” СДП Жиззах вилояти Кенгаш   ида  104 та бошланғич партия ташкилотлари фаолият юритади.   Сон эмас сифатни устун қўйган вилоят Кенгаш    аъзолари БПТлар фаолияти самарадорлигини  оширишга  алоҳида эътибор қаратилмоқда.  Хусусан, бу борада Жиззах тумани Кенгаши томонидан ибратли ишлар амалга оширилмоқда.

 -Ҳозирги кунда 376 нафар партия аъзоларни 8 та БПТга бирлаштирганмиз,— дейди “Адолат” СДП Жиззах туман Кенгаш   и раиси     Элдор Абдурасулов.— Бошланғич партия ташкилоти партиянинг негизи ҳисобланади ана шундай қуйи бўғин фаолиятини яхшилаш мақсадида туман Кенгаши томонидан семинар-тренинг ва сиёсий ўқувлар ташкил этилмоқда.

 Ўзбекистон “Адолат” СДП Жиззах туман Кенгаши томонидан партиянинг меъёрлар тўғрисидаги Низоми, ташкил этиш тартиби,  маҳаллий ва бошланғич партия ташкилотларининг ҳуқуқ ва ваколатлари тўғрисида, партия аъзолари, уларнинг иш жойи ва касбий йўналишидан келиб чиқиб БПТга бирлашиши,    аъзоларнинг ишдан бўш  вақтларида  қонунчилик меъёрларидан келиб чиқиб   корхона ва муассасаларда тузилган БПТларнинг ишини тўғри ташкил этиш борасида изланишлар олиб борлаяпти.

Бунга мисол қилиб туман тиббиёт бирлашмасида фаолият юритаётган башланғич партия ташкилотини мисол қилиш мумкин.   Ушбу бошланғич партия ташкилоти 40 нафар партия аъзоларини бирлаштирган бўлиб улар томонидан жорий йилнинг биринчи чораги давомида бир қатор ишлар амалга оширилди. Жумладан, улар томонидан “Соғлом она ва бола” йили давлат дастурининг ижросини таминлаш борасидаги тадбирларни мисол қилиш мумкин. БПТ аъзолари томонидан “Учтепа” қишлоқ фуқаролар йиғинида  истиқомат қилувчи 30 дан ортиқ хонадонларда она ва бола саломатлигини асраш, уларда  соғлом турмуш тарзини яратиш, эрта турмуш қуриш, яқин қариндошлар никоҳининг салбий оқибатлари каби мавзуларда тарғибот-ташвиқот ишларини амалга оширдилар.

— Жорий “Соғлом она ва бола” йилининг биринчи чораги давомида БПТ томонидан “Хотин-қизларни ижтимоий-сиёсий фаоллигини ошириш- обод ва фаровон турмушни таъминлашнинг муҳим омили”, “Репродуктив саломатлик-соғлом турмуш гарови”,    каби ўнлаб  тадбирларни  ташкил этдик,— дейди туман тиббиёт бирлашмаси БПТ фаоли Нодир Холхўжаев. — Ўтказилган тадбирлар билан бир қаторда БПТ фаоллари ташаббуси билан туман тиббиёт бирлашмасига  390 миллиондан ортиқ жиҳозлар келтирилди. Хусусан,  рақамли ултратовуш аппарати, кўз касалликларини аниқлаш бўйича афтолмоскоп ҳамда афтолмолигик жамланмалар, жарроҳлик асбоб ускуналари, рентген аппарати, туғруқхоналарда чақалоқлар бўлими учун жиҳозлар, мониторпоцента, автоклов аппаратлари, дори-дармонларни сақлаш учун совутгичлар келтирилиб ўрнатилди. Бу эса БПТ фаолларини ишида самарасини ошириш, беморларнинг саломатлигини асраш борасида кўпгина қулайликларни яратади.

Бугун туман тиббиёт бирлашмаси қошида БПТ аъзолари томонидан   ёшлар билан ишлаш ва уларни сиёсий жиҳатдан етук қилиб тарбиялаш ишларини такомиллаштириш борасида ҳам ижобий ишларни амалга оширмоқда. Айниқса, ўтказилаётган тадбирларда партия сафини  фаол ва ташаббускор ёшлар ҳисобига янгилаш, уларнинг сиёсий билимларини ошириш борасида тизимли ишлар ташкил этилмоқдаки, провардида аъзолар сони ошмоқда. Хусусан бошланғич партия ташкил этилганда улар сони 10 нафар  бўлган бўлса, бугунги кунда  уларнинг сони 40 нафарга етди. Бундан ташқари улар     БПТларнинг партия ва унинг дастурий мақсадларини қўллаб-қувватловчи фаол ва таниқли шахсларни танлаб олиш борасида ҳам  чора -тадбирларини ишлаб чиқган.

Бир сўз билан  айтганда Жиззах туман тиббиёт бирлашмасида фаолият юритаётган БПТ аъзолари ўзларининг жойларда олиб бораётган тарғибот-ташвиқот ишлари орқали аҳоли ишончига сазоввор бўлмоқда.

Маърифат МАВЛОНОВА,

Ўзбекистон “Адолат” СДП

Жиззах вилоят Кенгаши матбуот котиби

Жиззах вилоятнинг Бахмал туманидаги Болалар мусиқа ва санъат мактабида Ўзбекистон “Адолат” СДП Сиёсий Кенгаши, “Микрокредитбанк” акциядорлик-тижорат банки ҳамда Ўзбекистон Хотин-қизлар қўмитаси ҳамкорлигида имзоланган қўшма қарор ижросини таъминлаш мақсадида жойларда кичик бизнес ва хусусий тадбиркорликни янада ривожлантириш, айниқса, касб-ҳунар коллежлари битирувчиларини иш билан таъминлаш, шунингдек, хотин-қизлар тадбиркорлигини молиявий қўллаб-қувватлашга қаратилган “Кичик бизнес ва хусусий тадбиркорликни ривожлантириш, янги иш жойларини ташкил этиш, аҳолининг кенг қатлами учун, айниқса касб-ҳунар коллежи битирувчилари ва хотин-қизларнинг банк хизматларидан фойдаланишларини янада кенгайтириш” мавзусида семинар бўлиб ўтди.

Ўтказилган мазкур тадбирнинг мақсади Ўзбекистон “Адолат” СДП сайловолди дастурида белгиланган хотин-қизларга таъаллуқли қонунчиликни янада такомиллаштириш, уларнинг ижтимоий-сиёсий фаоллигини ошириш, ижтимоий ҳимоя қилишни кучайтиришга доир кенг кўламли ислоҳотларни изчил давом эттириш, айниқса ёшларнинг ташаббусларини қўллаб-қувватлаш ва уларга тадбиркорлик фаолиятларини йўлга қўйишларида кўмаклашиш мақсадида “Микрокредитбанк” АТБ банки билан ҳамкорлик янада мустаҳкамлашга қаратилганлиги билан эътиборлидир.

Семинарда Ўзбекистон “Адолат” СДП Сиёсий Кенгаши Аёллар ва ёшлар сиёсий фаоллигини ошириш бўлими мудири Райхона Урманова,  “Микрокредитбанк” АТБ Республика бошқаруви кредитлаш департаменти бошқармаси бошлиғи Ирода Қосимова, “Микрокредитбанк” АТБ Жиззах вилоят филиали бошқарувчиси Зафар Саримсоқов, вилоят Хотин-қизлар қўмитаси раиси, вилоят хокими ўринбосари, Олий Мажлис Сенати аъзоси Гулнора Мамадалиевна Тўраева, партиянинг вилоят Кенгаши раиси Рустам Равшанович Тўйчиев, Бахмал туман партия Кенгаши раиси Акбар Мирзақобилов ҳамда касб-ҳунар коллежи битирувчилари, тадбиркорлик билан шуғулланиш истагида бўлган ёшлар иштирок этишди.

Тадбир аввалида Ўзбекистон “Адолат” СДП, “Микрокредитбанк” АТБ ҳамда Хотин-қизлар қўмитаси томонидан тумандаги касб-ҳунар коллежлари битирувчиларидан 5 нафарига, тадбикор аёллардан 3 нафарига тадбиркорлигини йўлга қўйиш бўйича ишлаб чиқилган лойиҳаларига биноан умумий 89 500 000 сўм миқдоридаги имтиёзли кредит олиш ҳуқуқини берувчи сертификатлар топшириш маросими тантанали равишда ўтказилди.

Тадбирда маърузачилар ҳамда мутахассислар томонидан бугунги кунда жойларда кичик бизнес ва тадбиркорликнини ривожлантиришда молиявий ресурслар беришни янада кенгайтириш, янги иш жойлари ташкил этиш орқали аҳоли, шу жумладан, касб-ҳунар коллежларини битираётган ёшларни манзилли ишга жойлаштириш, шунингдек, аҳолининг кенг қатлами учун банк хизматларидан фойдаланиш борасидаги яратилган имконият ва шарт-шароитлар тўғрисида иштирокчиларга тегишли маълумот ҳамда тавсиялар берилди.

Қизғин баҳс-мунозара ва жонли мулоқотларга бой тарзда ўтказилган мазкур семинарда иштирокчилар ўзларини қизиқтирган мавзулар юзасидан берган саволларига мутахассислар томонидан тегишли тавсия ва тушунчалар бериб ўтилди.

“Адолат” СДП Жиззах вилояти Кенгаши матбуот хизмати

Жорий йилнинг 19 май куни Жиззах шаҳридаги “Узи-Жиззах” филиалида Ўзбекистон Республикаси Президентининг 2016 йил 24 февралдаги “Ўзбекистон Республикаси Меҳнат вазирлиги фаолиятини ташкил этишни такомиллаштириш чора-тадбирлари тўғрисида”ги қарори ижроси юзасидан оммавий ахборот воситалари ходимлари учун видеоконференция ўтказилиб, унда вилоят Меҳнат ва аҳолини ижтимоий муҳофаза қилиш бошқармаси, шаҳар ва туманлар Бандликка кўмаклашиш ва аҳолини ижтимоий муҳофаза қилиш маркази раҳбарлари, вилоятимизда фаолият юритаётган оммавий ахборот воситалари ходимлари ва журналистлар иштирок этди.

Онлайн тарзда ташкил этилган мазкур видеомулоқотда Ўзбекистон Республикаси Меҳнат вазирининг ўринбосари Баҳодир Низомовнинг  вазирлик томонидан жорий йилнинг тўрт ойи мобайнида аҳоли бандилигини таъминлаш ва янги иш ўринларнинг яратилиши, меҳнат муҳофазаси борасида қилинган ишлар юзасидан оммавий ахборот воситаларига ахбороти тингланди.

 Тадбир давомида оммавий ахборот воситалари ходимлари фуқароларнинг чет давлатларда ишлаши, аҳоли, жумладан касб-ҳунар коллежлари битирувчилари бандлигини таъминлаш, меҳнат қонунчилиги бўйича янгиликлар, меҳнат муҳофазаси ва жойларда яратилаётган бўш иш ўринлари юзасидан ўзларини қизиқтирган саволларга батафсил жавоб олдилар.

Маълумот ўрнида, жорий йилнинг ўтган даврида вилоятнинг шаҳар ва туманлардаги  Бандликка кўмаклашиш ва аҳолини ижтимоий муҳофаза қилиш марказлари томонидан маҳаллий ҳокимлик ва мутасадди ташкилотлар билан ҳамкорликда жами 9 маротаба меҳнат ярмаркалари ўтказилиб, унда 541 та корхона ва ташкилотлар ўзларидаги  1777 та бўш иш ўринлари билан қатнашиб, ярмаркаларга 757 нафар ишсиз фуқаролар жалб қилинганлиги, улардан 474 нафари доимий ишга жойлашиш учун йўлланмаларга эга бўлиб, 283 нафарига ҳуқуқий маслаҳатлар берилганлигини кўрсатиб ўтиш мумкин.

Бундан ташқари, ушбу марказларга иш сўраб мурожаат қилган 3520 нафар аҳолидан 3276 нафари квота ва янги яратилган иш ўринларига ишга жойлаштирилиб, ижтимоий ҳимояга олинган 80 нафар ишсизлар ҳақ тўланадиган жамоат ишларига жалб этилган. Ишсиз деб эътироф этилган 56 нафар шахслар вилоятдаги таянч касб-ҳунар коллежларида касбга қайта тайёрлаш ва ўқитиш орқали бандлиги таъминланган.

Тадбирда Ўзбекистон Республикаси Меҳнат вазирлиги фаолиятининг очиқлигини янада таъминлаш масалалари бўйича фикр алмашилди.

Ўзбекистон “Адолат” СДП

Жиззах вилоят Кенгаши

матбуот хизмати

Юртимизда тили, дини, эътиқотидан қатъий назар барча миллатларнинг тинч ва тотув ҳаёт кечириши учун барча шароитлар яратилган. Ўзбекистон Республикаси мустақилликни қўлга киритгандан сўнг юртимизда барча миллатларнинг тотувлик, бирдамлик, бағрикенглик ва дўстона муносабатларини янада ривожлантириш мақсадида миллий-маданий марказлар фаолияти йўлга қўйилиши юзасидан чора-тадбирлар белгиланиб, бу борада ҳамкорликда бир қатор тадбирлар ўтказилиб келинмоқда.

Худди шу каби тадбирлардан бири вилоят маркази Жиззах шаҳрида Ўзбекистон Республикаси Олий Мажлис Қонунчилик палатаси депутатлари, республика байналмилал маданият маркази, республика Хотин-қизлар қўмитаси, Ўзбекистон “Тасвирий ойина” ижодий уюшмаси каби бир  қатор давлат ва жамоат ташкилотлари вакиллари, диний идоралар, ҳудуддаги миллий-маданий марказлари фаоллари иштирокида Ўзбекистон Республикаси Мустақиллигининг 25 йиллиги муносабати билан “Ўзбекистон — умумий уйимиз” шиори остида  VI республика дўстлик ва маънавият фестивалининг вилоят босқичи ўтказилди. Таъкидлаб ўтиш жоизки, ушбу фестивалда сўз олганлар миллатлараро дўстлик, диний бағрикенглик, инсон ҳуқуқ ва манфаатлари устуворлигини таъминлаш, миллий қадриятларни асраш ва ривожлантириш, шунингдек, оналар ва болалар саломатлигини ҳимоялаш, баркамол авлодни шакллантириш борасида мамлакатимизда амалга оширилаётган ишлар ҳақида батафсил тўхталиб ўтдилар.

Тадбир аввалида Юнус Ражабий номидаги вилоят мусиқали драма театрида “Ўзбекистон – умумий уйимиз” номли ҳужжатли фильм намойиш қилинди. Шунингдек, фестивал доирасида Жиззах шаҳрида янги барпо этилган “Хотира хиёбони”, Пахтакор, Жиззах ва Янгиобод туманларидаги бир қатор маданий, маиший, ижтимоий-иқтисодий соҳа объектларига саёҳатлар уюштирилиб, “Соғлом авлод тарбиясида миллатлараро тотувликнинг ўрни” мавзусида илмий-амалий семинар, турли миллат вакилларининг либослари, халқ ҳунармандчилиги намуналари ҳамда чолғуларини ўзида акс эттирган “Биз сенинг фарзандларингмиз, Ўзбекистон” деб номланган кўргазма, “Миллий ва диний бағрикенглик — барқарорлик омили” мавзусидаги давра суҳбати, учрашувлар, шунингдек таниқли санъаткорлар ва миллий-маданий марказлар қошида тузилган бадиий жамоаларнинг концерт дастурлари ташкил этилди.

Тадбир якунида Жиззах шаҳрида барпо этилган “Дўстлик уйи”нинг очилиш маросими ташкил этилиб, янги бинода миллий-маданий марказлар фаолиятини мувофиқлаштириш кенгашининг навбатдаги йиғилиши ўтказилди.

Узоқбой РИСҚУЛОВ,

Ўзбекистон “Адолат” СДП

Жиззах вилояти Кенгаши

матбуот котиби

Бугунги кунда мамлакатимизда ёшларнинг таълим-тарбия олиши, ўзи истаган касб-ҳунарни эгаллаши ҳамда жисмоний тарбия ва спорт билан шуғулланиши учун барча шарт-шароитлар мавжуд. Шунингдек, улғайиб келаётган авлод вакилларининг билим ва салоҳиятларини намоён этиши учун кенг имкониятлар яратилган. Президентимиз ташаббуси билан мамлакатимизда мунтазам ўтказиб келинаётган уч поғонали “Умид ниҳоллари”, “Баркамол авлод” ва Универсиада спорт ўйинлари ҳам бу йўналишдаги самарали тадбирлар сирасига киради. Юртимизда спортни ривожлантиришга қаратилган ислоҳотлар, хусусан, биз юқорида тилга олган уч босқичли мусобақалар  ёшларимизнинг жаҳон ареналарида юқори натижаларга эришиши, мамлакатимиз довруғини дунёга танитиши учун хизмат қилмоқда.

Яқинда Фарғона вилоятида бўлиб ўтган “Универсиада — 2016” мусобақаларида иштирок этиб, бу фикрларга яна бир карра амин бўлдим. Шу маънода, юртимизнинг барча ҳудудлари сингари Фарғонада ҳам спортни тараққий эттириш борасида беқиёс ишлар амалга оширилганлигига гувоҳ бўлганлигимни таъкидлашим жоиз. Жумладан, 20 минг ўринли “Истиқлол” стадиони, 3 минг 200 ўринли футбол майдони, ёпиқ сузиш ҳавзаси ва бошқа спорт иншоотлари халқаро талабларга мослиги билан кўнглимизни фахр-ифтихорга тўлдирди. Қолаверса, кенг кўламли бунёдкорлик ишлари сабаб тобора чирой очиб бораётган Фарғона дилларимизни гўзалликка ошно этди.   Универсиада мусобақаларининг очилиш маросимида Юртбошимиз Ислом Каримовнинг “Универсиада – 2016” спорт ўйинлари иштирокчиларига йўллаган табриги эса биз спортчи ёшларга қанот бўлиб, янги-янги марралар сари руҳлантирди.

Мен 12 йилдан буён бокс билан шуғулланаман. Ўтган давр мобайнида 3 карра Ўзбекистон чемпионлигини, 2011 йилда эса Филлипинда бўлиб ўтган Осиё чемпионатида 1-ўринни қўлга киритиб, ёшлар ўртасида Осиё чемпиони сифатида олтин медал соҳиби бўлдим ва “Халқаро тоифадаги спорт устаси” деган унвонга лойиқ кўрилдим. Бу натижаларга “Умид ниҳоллари”, “Баркамол авлод” спорт мусобақалари асос вазифасини ўтади, десам янглишмайман. Фарғонада бўлиб ўтган Универсиада ҳам мен учун улкан омад келтирди.  Вилоятимга олтин медаль билан қайтдим. Мен бу ғалабани мамлакатимизда мен каби ёшларга яратилган имкониятлар, спорт соҳасига қаратилган эътибор натижаси сифатида баҳоладим. Шу маънода, Президентимиздан бениҳоят миннатдорман.

Ўз навбатида бизга яратилаётган шароитлар ва билдирилаётган ишончга мос равишда жаҳон чемпиони бўлишга, асосийси, юртимнинг садоқатли ва ватанпарвар фарзанди бўлишга ваъда бераман.

Жалолиддин ЎКТАМОВ,

               Жиззах давлат педагогика

институти 4-босқич талабаси,

бокс бўйича “Универсиада-2016”

спорт ўйинлари 1-ўрин соҳиби.

– Бугунги ўтказилаётган “Биз вайронкор ғояларга қаршимиз!” мавзусидаги давра суҳбати Ўзбекистон “Адолат” СДП Сиёсий Кенгаши томонидан ишлаб чиқилган “Ватан келажаги – ёшлар қўлида” лойиҳаси доирасида ташкил қилинди, – дейди партиянинг туман Кенгаши “Ёш адолатчилар” қаноти раиси Наимжон Муқумов. – Партиянинг туман Кенгаши томонидан тумандаги барча маҳаллаларда ўтказиб борилиши режалаштирилган.

Жиззах вилоятининг Янгиобод туманидаги “Пучуғой” маҳалла фуқаролар йиғини билан ҳамкорликда ўтказилган мазкур тадбирда Халқ депутатлари туман Кенгаши депутати Илҳом Анорбоев, туман Маънавият тарғибот маркази раҳбари Сабоҳат Абдураҳмонова, “Пучуғой” маҳалла фуқаролар йиғини раиси Комил Қорабоевлар дунёнинг айрим мамлакатларида юз бераётган хунрезликлар ва бунинг ортида турган Ислом дини ниқоби остида фаолият олиб бораётган қора кучлар, террористик ташкилотлар ҳамда уларнинг ғаразли ниятлари, улар таъсиридан ёшларни асраш, маҳаллаларда огоҳ ва ҳушёрликни ошириш борасида фикр-мулоҳазаларни билдириб ўтишди.

– “Адолат” СДП билан ҳамкорликни яхши йўлга қўйганмиз. Маҳалламизда партия фаоллари билан биргаликда 10 дан зиёд тарғибот-ташвиқот тадбирлари, давра суҳбатлари ва учрашувларни мунтазам равишда ўтказиб келинмоқда.  “Биз буюк юрт фарзандларимиз”, “Авлодларга озод ва обод ватан қолдирайлик”, “Эрта турмушга чиқишнинг олдини олиш ва унинг салбий оқибатлари”, “Биз соғлом турмуш тарафдоримиз” мавзуларда ўтказилган тадбирлар шулар жумласидандир, – дейди “Пучуғой” маҳалла , Комил Қорабоев. – Фақат тарғибот тадбирлари билан чегараланиб қолмай, партия фаоллари, депутатлар ва жамоатчилик вакиллари билан ҳар бир хонадонга кириб, оилаларда якка тартибдаги суҳбатлар уюштириш юзасидан чора-тадбирлар белгилаб олганмиз. Ҳамкорликда амалга оширилаётган бу каби тадбирлар ўз самарасини беришига ишонамиз.

Тадбир жараёнида маҳалла фаоллари ва ёшларига мавзуга доир фильмлар намойиши ташкил қилиниб, ота-онанинг фарзанд тарбиясига масъуллигини ошириш, ёшларнинг бўш вақтларини мазмунли ташкил қилиш масалаларига ҳам эътибор қаратилди. Маҳаллалар билан ҳамкорликнинг яхши йўлга қўйилганлиги партиянинг аҳоли орасидаги нуфузининг янада ошиши, ҳайрихоҳлари сонининг ортиши, айниқса, маҳаллаларда тинчлик ва осойишталик ҳукмрон бўлишига асос бўлиб хизмат қилиши табиийдир. Зеро, маҳалла тинч экан, юртимиз тинч.

Мавлонберди АБДУРАЗЗОҚОВ,

Ўзбекистон “Адолат” СДП

Янгиобод туман Кенгаши раиси

Кичик бизнес ва хусусий тадбиркорлик мамлакатимиз иқтисодиётининг асосий бўғини ҳисобланиб, бугунги кунда мазкур соҳани жадаллик билан ривожлантириш, тадбиркорлар фаолиятни қўллаб-қувватлаш, уларнинг сафини янада кенгайтириш ва рағбатлантириш бўйича кенг кўламли ишлар амалга ошириляпти. Айниқса, касб-ҳунар коллежлари битирувчилари ҳамда хотин-қизлар тадбиркорлигини кучайтириш масаласига алоҳида эътибор билан ёндашиляпти. Юртбошимиз раҳнамолигида тадбиркорлик фаолиятини қўллаб-қувватлаш, ёшларимизнинг ўз бизнес лойиҳаларини ҳаётга татбиқ этишлари учун барча имкониятлар яратиб берилмоқда.

 Мамлакатимиз тижорат банклари томонидан касб-ҳунар коллежлари битирувчиларини қўллаб-қувватлаш мақсадида кредитлар ажратилаётганлиги ҳам фикримиз тасдиғидир. Чунончи, Жиззах вилоятида Ўзбекистон “Адолат” СДП ва “Микрокредитбанк” АТБ билан ҳамкорликда ёшлар ва хотин-қизларни тадбиркорликка йўналтириш, хусусан, бизнес режа тузиш, кредит олиш имкониятларини кенгайтириш мақсадида семинарлар ташкил этиш анъанага айланган. Бунинг натижасида ҳудудда ёшлар ва хотин-қизлар томонидан ташкил этилаётган кичик бизнес ва хусусий тадбиркорлик субъектлари сони ортиб бормоқда. Бу ўз навбатида иш ўринлари сонининг кўпайиши, аҳоли турмуш фаровонлигининг ортиши учун хизмат қилаяпти.

— Ҳудудимиздаги Ғаллаорол саноат касб-ҳунар коллежини тамомлаганимдан сўнг “Микрокредитбанк”нинг Ғаллаорол туман филиалидан бир ярим йил муддатга 15 миллион сўм миқдорида кредит олиб, озиқ-овқат маҳсулотлари савдосини йўлга қўйдим, — дейди ғаллаороллик ёш тадбиркор Жасур Ҳамроев. — Айни вақтда ўз дўконимга эгаман, иккита иш ўрни яратдим. Натижада, янги марралар сари интилмоқдаман. Жумладан, банкдан яна кредит олиб, қолипли нон, макарон ва қандолат маҳсулотлари ишлаб чиқаришни режалаштирганман. Бу орқали мен 10 га яқин иш ўрнини яратишга эришаман. Мамлакатимизда тадбиркорлик борасида яратилган қулай шароит, ишбилармонлик муҳити учун Президентимиздан миннатдорман. Кўрсатилган кўмак учун албатта, Ўзбекистон “Адолат” СДП ва банк масъулларига ҳам ўз миннатдорчилигимни билдирмоқчиман.

Эришилаётган бу каби натижалар партиянинг тижорат банклари ва манфаатдор ташкилотлар билан ҳамкорлигини янада кучайтириш, бу йўналишдаги саъй-ҳаракатлар кўламини кенгайтиришга ундайди. Зеро, партия шу йўл билан юртимизнинг иқтисодий равнақи, аҳоли турмуш фаровонлигининг ортишига муносиб ҳисса қўшаётир. Бу жараёнда ёшларнинг етакчи кучга айлантириш партиянинг эзгу мақсади саналади.

Абдумажид ХИДИРОВ,

Ўзбекистон “Адолат” СДП

Ғаллаорол туман Кенгаши раиси

Жиззах вилоятининг Зафаробод туманидаги “Бирлик” қишлоқ фуқаролар йиғинида Ўзбекистон “Адолат” СДП Зафаробод туман Кенгаши ташаббуси билан Ўзбекистон Республикаси давлат мустақиллигининг 25 йиллигига бағишлаб “Ватан ҳисси, Ватан туйғуси ҳар недан улуғ” мавзуида тадбир ўтказилди.

Унда Халқ депутатлари туман Кенгаши депутатлари, туман ҳокимлиги масъул ходимлари, таълим муассасалари раҳбарлари, фуқаролар йиғинлари фаоллари, БПТ раҳбарлари, партия фаоллари, ота-оналар ва иқтидорли ёшлар иштирок этдилар. Йиғилишда партиянинг ҳудуддаги вакиллари томонидан ёш авлодни Ватанга муҳаббат руҳида тарбиялаш, миллатлараро муносабатларни мустаҳкамлаш, диний бағрикенглик ҳамда тинчлик ва осойишталикни қадрлаш юзасидан фикрлар билдирилди.

— Бу каби тадбирлар туманимизда мунтазам равишда ўтказилади, — дейди партиянинг туман Кенгаши раиси Гулбаҳор Хушвақтова. — Бу жараёнда асосий эътиборни ёшларга қаратаяпмиз. Йиғилиш, учрашув ва давра суҳбатлари давомида мамлакатимизда ёшларни ватанпарварлик, миллий истиқлол ғояси руҳида тарбиялаш, миллатлараро дўстлик, эътиқод эркинлигини таъминлаш борасида қилинаётган ишлар билан бир қаторда дунёнинг турли минтақаларида кечаётган қуролли тўқнашувлар, бу хунрезликларни амалга ошираётган кучларнинг қора ниятлари, тарғибот усуллари ҳақида маълумот бераётирмиз. Табиийки, партиямиз томонидан амалга оширилаётган ишлар, мақсадларимиз ҳамда сиёсий платформамиз тўғрисида ёшларни хабардор қилиш чораларини ҳам кўраяпмиз.

Тадбир давомида ўтган 25 йил давомида мамлакатимизда кечган сиёсий ва иқтисодий ислоҳотлар ҳамда эришилган ютуқлар ҳақида фикр юритилди. Бу каби йиғилишларнинг мунтазам ташкил этилиши аҳолининг сиёсий билимларини кучайтириш, ёшларда юртга бўлган муҳаббатни янада ошириш ва партиямиз ҳайрихоҳлари сафини кенгайтиришда муҳим омил вазифасини ўтайди.

Узоқбой РИСҚУЛОВ,

Ўзбекистон “Адолат” СДП

Жиззах вилоят Кенгаши матбуот котиби

Ўзбекистон “Адолат” СДПнинг Жиззах давлат педагогика институтида фаолият юритаётган бошланғич партия ташкилоти ташаббуси билан “Камолот” ЁИҲ вилоят Кенгаши, Маънавият тарғибот маркази вилоят бўлими, Хотин-қизлар қўмитаси ҳамкорлигида “Биз мафкуравий таҳдидларга қаршимиз” мавзусида маънавий-маърифий тадбир ташкил қилинди.

– Партиямиз томонидан бу каби тадбирларнинг ташкил этилиши ёшларда мафкуравий иммунитетни шакллантириш, уларни турли бузғунчи, вайронкор ғоялар, мафкуравий хуружлар таъсири доирасига тушиб қолишдан асрашда аҳамияти катта. Замон талабидан келиб чиқиб, ҳар бир фуқаро лоқайдлик ва бепарволикка берилмаслиги, теварак-атрофимизда бўлаётган воқеа-ҳодисаларга ўта ҳушёрлик билан қараши, сергаклик ва огоҳликни бугунги кун талаби деб билмоғи, муҳтарам Юртбошимиз айтганидек, “Ғояга қарши фақат ғоя, фикрга қарши фақат фикр, жаҳолатга қарши фақат маърифат билан курашиш керак,” – дея фикр билдирди Халқ депутатлари Жиззах шаҳар Кенгаши депутати Фахриддин Қобилов.

Тадбирда маъруза қилган Халқ депутатлари вилоят ва шаҳар Кенгашлари депутатлари, олий ўқув юртининг профессор ўқитувчилари, “Камолот” ЁИҲ фаоллари, Маънавият тарғибот маркази ходимлари ва партия фаоллари халқаро майдонда мафкуравий, ғоявий, информацион хуружлар кучайиб бораётган даврда мамлакатимизда миллий ғоя ва маънавий ишлар тарғиботининг самарадорлигини янада ошириш замон талаблари асосида олиб борилаётгани тўғрисида таъкидлашди. Ислом дини ниқоби остида янги империя тузишга қаратилган ҳаракатлар, миллий қадриятлар ва динни сохталаштиришга уринишлар, ахлоқсиз ғояларни тарғиб қилиш орқали халқ маънавиятини бузишга интилишлар, турли мафкуравий воситалар орқали минтақавий ва давлатлараро мажароларни келтириб чиқариш, “Ғарб маданияти” ва “турмуш тарзи”ни тарғиб қилиш орқали миллий урф-одат ва маданиятга қарши туриш каби мафкуравий таҳдидларнинг ёшларимиз келажаги учун нечоғлик салбий таъсир кўрсатишини ҳис қилган ҳолда тарғибот-ташвиқот тадбирларининг самарадорлигини янада оширишга эътиборни қаратиш лозимлиги уқтирилди.

Дарҳақиқат, ёшларимиз – бизнинг келажагимиз, эртанги кунимиз. Уларни руҳан хотиржам, маънан етук, ўзлигини унутмайдиган, Ватан туйғусини барча нарсадан азиз деб билиб, Она Ватан истиқлоли ҳимоясига шай, юртга садоқат руҳида тарбияламоғимиз даркор. Шундагина ёшларимиз ҳеч кимга ва ҳеч қачон алданмайди. Ҳатто чорасизликда ҳам ўз бурчини унутмайди. Ўз Ватани ва ўз халқига хиёнат қилмайди.

Ватанни муқаддас билганнинг ғурури ва ифтихори юксак бўлади, деб бежизга айтилмаган. Зеро, бу азиз Ватан, шу муқаддас замин ота-боболаримиздан бизга, биздан эса келажак авлодга боқий мерос бўлиб қолади. Буни ҳар биримиз чин қалбдан ҳис қилмоғимиз лозим.

Ражаббой НАБИЕВ,

Ўзбекистон “Адолат” СДП

Жиззах шаҳар Кенгаши раиси

Халқимиз томонидан меҳр-оқибат, ўзаро ҳурмат ва эътиборли бўлиш сингари фазилатлар асрлар давомида қадрланиб келинаётганлиги ҳеч кимга сир эмас. Айниқса, мамлакатимиз мустақилликни қўлга киритганидан сўнг бу каби миллий қадриятларимиз, урф-одатларимизни асраб-авайлаш ва улуғлашдек эзгу амалларга эътибор янада кучайди.

Энг улуғ, энг азиз байрам – Ўзбекистон Республикаси Мустақиллигининг 25 йиллик тантаналарига қизғин тайёргарлик кўрилаётган айни дамларда Жиззах шаҳридаги “Жиззах” кексалар ва ногиронлар, уруш ва меҳнат фахрийлари санаторийсида республикамизнинг Тошкент, Сирдарё, Самарқанд, Навоий вилоятлари ва Жиззах воҳасидан ташриф буюриб, ўз соғлигини тиклаётган уруш ва меҳнат фахрийлари учун байрам тадбири ташкил қилинди. Ўзбекистон “Адолат” СДП Жиззах вилоят Кенгаши ташаббуси билан ташкил этилган “Cаҳоват беназир қадрият” лойиҳаси доирасида “Қарияларни қадрлаш – муқаддас бурчимиз” мавзусидаги мазкур тадбирда “Нуроний” жамғармаси вилоят бўлими, Соғлиқни сақлаш бошқармаси, “Ногиронлар” жамияти вилоят бўлими, Кўзи ожизлар жамиятига қарашли вилоят кутубхонаси вакиллари, “Жиззах ҳақиқати” – “Джизакская правда” газеталари ҳамда вилоят телерадиокомпанияси ходимлари иштирок этдилар.

Таъкидлаб ўтиш жоизки, байрам тадбирида сўз олганлар бугунги кунда мамлакатимизда кексаларни эъзозлаш борасида амалга оширилаётган ишлар билан боғлиқ жараёнларнинг жамият ривожланишининг муҳим ижтимоий масаласи сифатида эътироф этилаётгани, ёши улуғ инсонларга нисбатан ҳурмат-эҳтиром, меҳр-оқибат кўрсатиш маънавий ҳаётимиз ва миллий қадриятларимизнинг ажралмас қисми ва юксак маънавият белгиси эканлиги, шунингдек, уларни қадрлаш, сермазмун ва бой ҳаёт тажрибасини аҳоли, айниқса ёшлар орасида кенг тарғиб қилиш борасидаги ишларни янада жонлантириш лозимлигини таъкидлашди. Якка-ёлғиз қариялар, ногирон кексалар, уруш ва меҳнат фахрийларининг уйларига ташриф буюриб, уларнинг ҳолидан хабар олиш, меҳр-мурувват, моддий ва маънавий ёрдам кўрсатиш Ўзбекистон “Адолат” СДП фаолларининг олдида турган энг муҳим устувор вазифалардан бири эканлиги ҳам эътироф этилди.

– Биз кексаларга бўлган эътибор йилдан-йилга кучаймоқда. Бундан беҳад хурсандмиз. Кўрсатилаётган ҳурмат-эътибор учун Юртбошимиздан миннатдормиз. – дейди Тошкент вилояти Пискент тумани “Бирлик” маҳалласидан ташриф буюрган Рисолат она Бўронова. – Бу сиҳатгоҳга илк маротаба ташриф буюрган бўлсамда, тоза ҳавоси, табиати, яратилган шарт-шароитлар ҳамда кўрсатилаётган хизматлар менга маъқул келди. Кексаларнинг соғлигини тиклаб, мароқли дам олиши учун барча шароитлар муҳайё эканлигининг гувоҳи бўлдим. Айни дамда, бугунги тадбирнинг ташкил этилиши менда катта таассурот уйғотди. Тадбир ташкилотчилари, жумладан Ўзбекистон “Адолат” СДП фаолларининг ташаббускорлиги мени қувонтирди. Уларга кексалар номидан  миннатдорчилик билдираман.

Тадбир жараёнида сиҳатгоҳда дам олувчи кексалардан бир гуруҳига Ўзбекистон “Адолат” СДП вилоят Кенгаши ҳамда “Нуроний” жамғармаси вилоят бўлимининг совғалари улашилди. Жиззах воҳасининг таниқли эстрада хонандалари томонидан ижро этилган жозибали куй-қўшиқлар, Кўзи ожизлар жамиятига қарашли кутубхонаси ходимлари томонидан тайёрланган бадиий чиқишлар байрам тадбирига ўзгача файз киритди.

Узоқбой РИСҚУЛОВ,

Ўзбекистон “Адолат” СДП

Жиззах вилоят Кенгаши матбуот котиби

Жорий йилнинг 27-29 июл кунлари Ўзбекистон “Адолат” социал-демократик партиясидан Олий Мажлис Қонунчилик палатасига  32-Ғаллаорол сайлов округидан сайланган депутат Тўлқин Абдусатторов вилоятнинг Ғаллаорол тумандаги “Сарбозор”, “Мирзабулоқ”, “Мулкуш” фуқаролар йиғинларида ўз сайловчилари билан учрашди. Унда Ўзбекистон “Адолат” СДП вилоят Кенгаши раиси Р.Тўйчиев, партиянинг туман Кенгаши раиси А.Хидиров, туман ҳокимлиги вакиллари, фуқаролар йиғинлари фаоллари ҳамда сайловчилар иштирок этдилар.

Учрашувда сўз олган Олий Мажлис Қонунчилик палатаси депутати Т.Абдусатторов қонунчилик палатаси томонидан ишлаб чиқилаётган янги қонунлар, уларнинг мазмун-моҳияти, мазкур қонунларнинг мамлакатимиз ва халқимиз ҳаётидаги аҳамияти, мустақиллик туфайли юртимизда амалга оширилаётган кенг кўламдаги ислоҳотлар, бунёдкорлик ишлари, муҳтарам Президентимизнинг “Ўзбекистон Республикаси давлат мустақиллигининг йигирма беш йиллик байрамига тайёргарлик кўриш ва уни ўтказиш тўғрисида”ги қарорида белгилаб берилган вазифалар, байрамга қизғин тайёргарлик кўриш ва уни муносиб равишда кутиб олиш, дунёнинг айрим давлатларида юз бераётган нотинчликлар, нохуш воқелардан хулоса чиқарган ҳолда огоҳлик ва ҳушёрликни янада ошириш, айниқса, ўсиб келаётган ёш авлодни турли хил оқимлар ва ёт ғоялар таъсиридан сақлаш, бу борада кенг жамоатчиликнинг ролини янада ошириш лозимлиги тўғрисида айтиб ўтди.

Шунингдек, жорий йилнинг 23-24 июн кунлари Оқсарой қароргоҳида Президентимиз Ислом Каримов раислигида бўлиб ўтган Шанхай ҳамкорлик ташкилоти Давлат раҳбарлари Кенгашининг навбатдаги мажлисида муҳокама қилинган масалаларга эътибор қаратди. Ушбу мажлисда диний экстремизм ва терроризмга қарши кураш, гиёҳванд моддалар ва қурол-яроғларнинг ноқонуний айланишининг олдини олиш, минтақада хавфсизлик ва барқарорликни мустаҳкамлаш, давлатлар ўртасида ижтимоий-иқтисодий, маданий ва бошқа соҳаларда ҳамкорликни ривожлантириш масалалари кўриб чиқилганлиги тўғрисида фикр-мулоҳазаларини билдириб ўтди.

Ўтказилган учрашувларда иштирок этган маҳалла фаолларидан Бахтиёр Акромов, Муҳаббат Оқназарова, Инъом Умматов, Ўктам Тўраев, Рашид Турсуновлар сўзга чиқиб, депутатнинг фикр-мулоҳазаларини қўллаб-қувватлаб, жойларда ечимини кутаётган муаммолар юзасидан таклифларини билдириб ўтишди. Жумладан, “Сарбозор” маҳалла фуқаролар йиғини фаоли ва меҳнат фахрийси Бахтиёр Акромов ва Инъом Умматовлар томонидан бугунги кунда 5200 нафардан зиёд аҳоли истиқомат қиладиган маҳаллада 500 нафарга яқин боғча ёшидаги болалар учун йиғин ҳудудида мактабгача таълим муассасасининг мавжуд эмаслиги туфайли 3-4 км масофадаги муассасага қатнашга тўғри келаётганлигини инобатга олиб, маҳалла ҳудудида замонавий типдаги мактабгача таълим муассасаси қуриш айни муддао эканлиги, шунингдек, “Сарбозор” маҳалла фуқаролар йиғини туман йўл қурилиши корхонаси биносида битта хонада жойлашганлиги сабабли маҳалла фуқаролар йиғинига янги маъмурий бино қуриш бугунги куннинг талабларидан бири эканлиги тўғрисидаги таклифлар ўртага ташланди.

Учрашув жараёнида сайловчиларни қизиқтирган саволларга депутат томонидан фикр-мулоҳазалар билдирилди.

Узоқбой РИСҚУЛОВ,

Ўзбекистон “Адолат” СДП

Жиззах вилоят Кенгаши матбуот котиби

Ўзбекистон судьялар ассоциацияси Жиззах вилояти филиали ва Ўзбекистон “Адолат” СДП Жиззах вилоят Кенгаши ҳамкорлигида ишлаб чиқилган чора-тадбирлар режаси ижроси партиянинг шаҳар ва туман Кенгашлари томонидан инсон ҳуқуқ ва эркинликларини суд орқали ҳимоя қилиш тизимини янада такомиллаштириш, суднинг холислиги, адолатлилиги, ҳар бир фуқаронинг ундан фойдаланишини таъминлаш, суд ҳимояси соҳасини янада кенгайтириш, суд фаолиятига доир маълумотлардан аҳолини хабардор қилиб боришга қаратилган тарғибот-ташвиқот тадбирлари ўтказилиб келинмоқда.

Ўзбекистон “Адолат” СДП Зарбдор туман Кенгаши томонидан Жиноят ишлари бўйича Зарбдор туманлараро суди билан ҳамкорликда “Биргаликда юксак ҳуқуқий маданият сари” лойиҳаси доирасида “Инсон ҳуқуқ ва эркинликларини суд орқали ҳимоя қилишни янада такомиллаштиришда янада фаол бўлайлик” мавзусида давра суҳбати шулар жумласидан. Унда Ўзбекистон “Адолат” СДП туман Кенгаши раиси Феруз Ҳамзаев, Жиноят ишлари бўйича Зарбдор туманлараро суди раиси Улуғбек Хидирбоев, тумандаги умумтаълим мактабларининг маънавий-маърифий ишлар бўйича директор ўринбосарлари ҳамда партия фаоллари иштирок этдилар.

Тадбирда маърузачилар томонидан Ўзбекистон Республикасининг 2000 йил 14 декабрдаги “Судлар тўғрисида”ги Қонунининг 2-моддасига асосан Ўзбекистон Республикасининг Конституцияси ва бошқа қонунларида, инсон ҳуқуқлари тўғрисидаги халқаро ҳужжатларда эълон қилинган фуқароларнинг ҳуқуқ ва эркинликларини, корхоналар, муассасалар ва ташкилотларнинг ҳуқуқлари ҳамда қонун билан қўриқланадиган манфаатларини суд йўли билан ҳимоя қилишга даъват этилганлиги айтиб ўтилиб, Президентимизнинг Вазирлар Маҳкамасида ўтказилган кенгайтирилган мажлисдаги маърузасидан келиб чиқиб, бугунги кунда хусусий мулкдорлар ва тадбиркорларнинг қонуний ҳуқуқларини ҳимоя қилиш, уларнинг фаолияти кафолатларини кучайтириш масаласини ҳал этишда суд органлари ролини оширишга алоҳида аҳамият берилаётганлиги, судлар тўғрисида даъво аризаси кўриб чиқилаётган пайтда тадбиркорлик субъекти назорат органининг қароридан норози бўлса, унинг ижросини тўхтатиб туриш ҳуқуқига эга эканлигига эътибор қаратилди. Шунингдек, мазкур қонунда белгилаб қўйилган Ўзбекистон Республикаси фуқаролари, чет эл фуқаролари ва фуқаролиги бўлмаган шахслар давлат органлари ва бошқа органларнинг, мансабдор шахсларнинг ҳар қандай ғайриқонуний хатти-ҳаракатларидан (қарорларидан), шунингдек, ҳаёти ва соғлиги, шаъни, қадр-қиммати, шахсий эркинлиги, мол-мулки ва бошқа ҳуқуқ ва эркинликларига тажовузлардан суд томонидан ҳимоя қилиниш ҳуқуқига эга эканлиги тўғрисида ҳам тўхталди.

Жонли мулоқот тарзида ўтказилган мазкур давра суҳбатида иштирокчиларни қизиқтирган саволларга мутахассислар томонидан тегишлича маълумот бериб ўтилди.

Ҳусниддин ШАРИПОВ,

                 Ўзбекистон “Адолат” СДП

Жиззах вилоят Кенгаши раис ўринбосари

Ўзбекистон Республикаси Олий Мажлиси Қонунчилик палатаси депутати Людмила Кошелапованинг аҳоли ва сайловчилар билан ўтаётган учрашувлари Зангиота туманининг «Назарбек» ҚФЙси ва «Назарбек» санаториясида ўтказилди. Йиғилишда  Ўзбекистон “Адолат” СДП Тошкент вилоят Кенгаши раиси Равшан Талипов, Халқ депутатлари Тошкент вилоят Кенгаши депутати Умид Шоумаров, Ўзбекистон “Адолат” СДП Зангиота  туман Кенгаши депутатлари, партия фаоллари, БПТ, МФЙ ва ҚФЙ раислари, ДАТ “Асакабанк” вилоят бўлими масъул ходими, фуқаролар, мактаб фаолларидан иборат иштирокчилар қатнашди.

Учрашувда иштирокчилар ўтган давр мобайнида  туманда бўлаётган ўзгаришлар, юксалишларни гапириб ўтиш билан бирга бир қатор масалалар ҳам ўртага ташлашди. Энг асосий муаммолардан бўлган Зангиота туманида туғруқхона қуриш, маҳаллаларни ички йўлларини таъмирлаш, ичимлик суви муаммоси, электр токи танқислиги ҳал этиш юзасидан фуқаролар ва сайловчилар томонидан билдирилган фикр-мулоҳазаларга катта эътибор қаратилди.

Куннинг иккинчи ярмида Л.Кошелапова “Назарбек” санаториясига ташриф буюриб, у ерда мавжуд шарт-шароитлар ва шифокорларнинг фаолияти билан яқиндан танишди. Учрашувда депутат тингланган масалалар юзасидан ўзининг таклиф ва тавсияларини билдирди.

Учрашувдан сўнг Л.Кошелапова Зангиота туманидаги Тошкент вилояти Эркин ва юнон-рум кураш Федерациясига таклиф этилди. Депутат  юнон-рум кураши бўйича ўтказилаётган  вилоят турнири мусобақасини кузатаркан, унда барча иштирокчиларга ғолибликни қўлга киритишларида омадлар тилади. Фарзандлари соғлом юртнинг келажаги ҳам албатта соғлом бўлиши, бугуннинг баркамол авлодлари, эртамиз эгалари эканлиги тўғрисидаги ишонч билан айтилган илиқ фикрлари, мусобақа иштирокчилари бор куч-ғайрати, маҳоратини намоён этиб, марра сари дадиллик билан ҳаракат қилишга чорлади.

Шунингдек, Л.Кошелапова Федерацияга ташрифи чоғида, у ерда яратилган шароитлар, спорт мураббийлари билан танишиб, уларнинг фаолияти ва ўтказилган мусобақа бўйича ўзининг таассуротларини баён қилди.

Шунингдек, Қибрай туманининг “Дўрмон” ҚФЙсида “Келажак бизники, марра бизники” мавзусида ўтказилди. тадбирда Ўзбекистон “Адолат” СДП Тошкент вилоят Кенгаши раиси Равшан Талипов,  Ўзбекистон “Адолат” СДП  Тошкент вилояти “Аёллар қаноти” Кенгаши раиси Вилоят Акромова, Ўзбекистон “Адолат” СДП Қибрай туман Кенгаши раиси Фахриддин Холдоров,   “Асакабанк” вилоят бўлими масъул ходим Акбар Сиддиқов ҳамда  партия фаоллари, БПТ, МФЙ ва ҚФЙ раислари, фуқаролар иштирок этишди. Тадбирни Ўзбекистон “Адолат” СДП Тошкент вилоят Кенгаши раиси Равшан Талипов кириш сўзи билан очиб берди.

Тадбирда Ўзбекистон “Адолат” СДП  Тошкент вилояти “Аёллар қаноти” Кенгаши раиси Вилоят Акромова, Ўзбекистон “Адолат” СДП Қибрай туман Кенгаши раиси Фахриддин Холдоров,   “Асакабанк” вилоят бўлими масъул ходим Акбар Сиддиқовлар ҳам сўзга чиқиб, бугунги кунда туманда олиб борилаётган ижтимоий ислоҳотлар, бунёдкорлик ишлари ва тадбирнинг аҳамияти ҳусусида ўзларининг фикр-мулоҳазаларини билдирдилар. Тадбир давомида “Дўрмон” ҚФЙ фуқаролари ва сайловчилар ўзларини электр токи танқислиги юзасидан қизиқтирган саволларига атрофлича жавоб олишди. Ўтказилган учрашув йиғилганларда ўзгача таассурот қолдирди.

Куннинг иккинчи ярмида Зангиота туман кўп тармоқли марказий поликлиникада ва 14-сонли ўрта мактабда ҳам учрашув ўтказилиб, муассасаларнинг имкониятлари ва муаммолари атрофлича ўрганилди.

Ўзбекистон Республикаси Олий Мажлиси Қонунчилик палатаси депутати Людмила Кошелапованинг аҳоли ва сайловчилар билан ўтаётган учрашувлари ўз ниҳоясига етди. Учрашувлар якунида туманларда кўтарилган масалалар тубдан ўрганилиб, Олий Мажлис Қонунчилик палатаси фракцияси йиғилишига киргизишга ва ўз ечимини топишда саъй-ҳаракатлар  олиб борилиб, ижобий бартараф этиш режалари тузилди. Ана шундай эзгу мақсадлар асносида ўтказилган самимий учрашувлар эса эртанги кунимизда ўз самарасини бермай қолмайди.

Зулайхо Чўлпонова,

Ўзбекистон “Адолат” СДП

Тошкент вилояти Кенгаши

матбуот котиби

Мамлакатимиз мустақилликни қўлга киритганидан кейинги ўтган давр мобайнида ёшларнинг жисмонан соғлом, баркамол бўлиб етиши, жисмоний тарбия ва спорт билан мунтазам шуғулланиши учун барча шароитлар яратиб берилганлиги ҳеч кимга сир эмас. Бугун ёшларимиз спортнинг кураш, шахмат-шашка, футбол, теннис, бокс, гимнастика каби бир қанча турларида жаҳон ареналарида етакчиликни қўлдан бермай келаётганликлари айни ҳақиқат.

Эътиборли жиҳати шундаки, мутасадди идора ва ташкилотлар ҳамкорлигида ўтказилиб келинаётган кўплаб мусобақалар юртимизда жисмоний тарбия ва спортни ривожлантириш, ўсиб келаётган ёш авлодни жисмонан бақувват, маънан баркамол этиб тарбиялашга хизмат қилиши табиий. Ватанимизнинг барча ҳудудлар қамраб олинаётган спорт тадбирлари орқали ёшлармиз орасидан янги-янги истеъдодли спортчиларнинг кашф этилаётганлиги барчамизни қувонтиради, албатта.

Худди шундай спорт тадбирларидан бири Ўзбекистон Республикаси давлат мустақиллигининг 25 йиллигига бағишлаб Жиззах туманидаги                                 14-умумтаълим мактаби спорт залида “Гўзал ва бетакроримсан, муқаддас Ватаним, жоним сенга фидо, Ўзбекистоним!” шиори остида ўтказилди.

Спортнинг ТАЭКВАНДО (ИТФ) тури бўйича ўтказилган вилоят чемпионати Ўзбекистон “Адолат” СДП Жиззах вилоят Кенгаши, Маданият ва спорт ишлари бошқармаси, “Камолот” ЁИҲ Жиззах вилоят Кенгаши, вилоят ТАЭКВОН-ДО (ИТФ) Миллий ассоциацияси, вилоят Яккакураш спорт турлари бўйича ихтисослаштирилган болалар ва ўсмирлар спорт мактаби ҳамкорлигида ташкил қилинди. Унда вилоятимиздаги спортнинг ушбу тури билан шуғулланиб келаётган 2005-2006, 2007-2008 йилларда туғилган 70 нафар ёш спортчилар 5 та вазн тоифасида ўзаро беллашдилар. Муросасиз кечган баҳслар якунига кўра, 10-11 ёшли спортчилар ўртасида Шоҳруҳ Исломқулов, Даврон Имомқулов, Севара Қўшбоқова, Самандар Ҳамроқулов, Моҳидил Эркиновалар биринчи ўринни қўлга киритган бўлса, 8-9 ёшли спортчилар ўртасида Отабек Суннатов, Муниса Давлатбоева, Темур Ўроқбоевлар ғолиб бўлиб, ўзларининг тенгсиз эканликларини исботлашди.

– Спортнинг ушбу тури билан 4 йилдан буён мунтазам шуғулланиб келаман. Юртимизда мен сингари ёшларнинг спорт билан шуғулланиши учун барча шароитлар муҳайё. Бунинг учун Президентимиздан миннатдормиз,– дейди мусобақа қатнашчиси Достон Мустафоқулов. – Ёш бўлишимга қарамай, 6 марта вилоят, 2 маротаба республика чемпионатида ғолибликни қўлга киритдим. Гарчи мен бугунги ўтказилган турнирда ғолибликни қўлга кирита олмаган бўлсамда, ўз устимда мунтазам ишлаб, келгусида ўтказиладиган мусобақалар ғолиби бўлиш ҳамда республика ва Осиё  миқиёсида ўтказиладиган мусобақаларда фаол иштирок этиб, жаҳон аренларида юқори ўринларни эгаллаш орзусидаман. Барча тенгдошларимга спорт билан шуғулланишини тавсия қиламан. Чунки, соғлом танда ҳамиша соғ ақл бўлади.

Ғолиб бўлган ёш спортчилар мусобақанинг республика босқичида иштирок этиш имкониятини қўлга киритдилар. Тадбир якунида ғолиблар ташкилотчиларнинг диплом ва қимматбаҳо совғалари билан тақдирланди.

Узоқбой РИСҚУЛОВ,

Ўзбекистон “Адолат” СДП

Жиззах вилоят Кенгаши матбуот котиби

Ўзбекистон “Адолат” СДП Жиззах вилоят Кенгаши ҳамда партиянинг Жиззах шаҳар Кенгаши ҳамкорлигида Мудофаага кўмаклашувчи “Ватанпарвар” ташкилоти вилоят Кенгашида партиянинг “Буюк ва муқаддассан, ҳур Ўзбекистон!” лойиҳаси доирасида “Ватан ҳимояси йўлида барчамиз бирдек масъулмиз” мавзусида тадбир ташкил этилди. Унда Ўзбекистон “Адолат” СДП Жиззах вилоят Кенгаши раис ўринбосари Нигора Жўраева, партиянинг Жиззах шаҳар Кенгаши раиси Ражаббой Набиев, Мудофаага кўмаклашувчи “Ватанпарвар” ташкилоти Жиззах вилоят Кенгаши раиси Хайрулла Атаев, “Жиззах” автомобил мактаби раҳбари Ш.Турсунбоев ҳамда ташкилот ходимлари қатнашдилар.

Тадбирда сўзга чиққанлар томонидан Ўзбекистон “Адолат” СДП мақсад ва вазифалари, партия томонидан олиб борилаётган тарғибот-ташвиқот тадбирлар билан бир қаторда партия ташкилотлари ва уларни ташкил қилиши тартиб-қоидалари, партия аъзолигига қабул қилиш ҳамда аъзоларнинг ҳуқуқ ва мажбуриятлари, корхона, ташкилот ва муассасаларда бошланғич партия ташкилоти фаолиятини йўлга қўйиш юзасидан маълумот бериб ўтилди. Шу билан бирга, юртимизда мустақиллик шарофати билан қўлга киритилган ютуқлар, жонажон Ўзбекистонимизнинг мустақиллигининг 25 йиллиги байрами муносабати билан амалга оширилаётган улкан бунёдкорлик ишлари, шунингдек, дунёдаги айрим мамлакатларда юз бераётган нотинчлик ва хунрезликларларни кузатиб, бугунги дориломон, тинч ва осуда замонда, жаннатмакон ўлкада яшаётган ҳар бир фуқаро қалбида фахр-ифтихор туйғусини ҳис этиши, ёшларимиз орасида ҳуқуқбузарлик ва жиноятчиликнинг ошиб кетишининг олдини олишга эътибор қаратиш лозимлиги тўғрисида ҳам тўхталди.

Тадбир жараёнида ташкилий масала ҳам кўриб чиқилди. Ташкилот раҳбарияти ва ходимларининг талаб ва таклифлари инобатга олиниб, Ўзбекистон “Адолат” СДП Уставига биноан Мудофаага кўмаклашувчи “Ватанпарвар” ташкилоти вилоят Кенгашида партиянинг Бошланғич партия ташкилоти ташкил қилинди. Ушбу бошланғич партия ташкилоти раислигига бир овоздан Мудофаага кўмаклашувчи “Ватанпарвар” ташкилоти вилоят Кенгаши раис ўринбосари Мансур Бакахонов сайланди.

– Мен бир неча йилдан буён “Адолат” СДПга аъзо бўлиш ниятида эдим. Орзуларим ушалди. Бугундан партия аъзосиман. Келгусида меҳнат фаолиятим давомида партия аъзоси сифатида “Адолат” партиясининг Уставида берилган ҳуқуқ ва мажбуриятларимни бажариб, партия фаолиятига ўзимнинг муносиб ҳиссамни қўшишга эътибор қаратаман. Қолаверса, партия аъзоси сифатида ташкилотимизда ўтказилаётган ҳар бир тадбирда фаоллик кўрсатишга ҳаракат қиламан, – дейди Мудофаага кўмаклашувчи “Ватанпарвар” ташкилоти вилоят бўлими Кенгаши ходими Жамшид Азимов.

Тадбир якунида Ўзбекистон “Адолат” СДПнинг аъзолик билетлари ва совғалар ўз эгаларига тантанали равишда топширилди.

Узоқбой РИСҚУЛОВ

Ўзбекистон “Адолат” СДП

Жиззах вилоят Кенгаши матбуот котиби